На Астравеччыне праходзяць рэйды супраць няшчасных выпадкаў на лёдзе
11:09 / 12.02.2018
Прадстаўнікі раённага аддзела па надзвычайных сітуацыях, міліцыі і раённай арганізацыі выратавання на водах рэгулярна праводзяць сумесныя рэйды, каб прадухіліць няшчасныя выпадкі на лёдзе.
Вы ведаеце, што чорны колер лёду гаворыць пра яго небяспеку? А як можна дапамагчы сабе ці таварышу, калі здарыцца бяда? У вас ёсць вяроўка? Як вы сябе адчуваеце? Можа, вам патрэбна дапамога?.. Шчыра прызнацца, здзіўлялі не пытанні, якія кожны год задаюць удзельнікі прафілактычных рэйдаў, не іх заклікі памятаць пра бяспеку і нават не тое, што яны па некалькі разоў на тыдзень самі рызыкуюць жыццём дзеля выратавання іншых, – а тое, што колькасць тых, хто слухаў і згодна ківаў галовамі, нават у дзень, калі з-за моцнага ветру быў аб'яўлены аранжавы ўзровень бяспекі, – на Янаўскім вадасховішчы і на рэчцы Лоша аказалася нямала.
Дарэчы, на вадаёмах Астраўца ў гэты дзень было бязлюдна. Асабліва ўзрадавала, што дзеці, якія яшчэ не паспелі нарадавацца сапраўднаму зімняму надвор'ю, аказаліся мудрэйшымі за сваіх бацькоў і дзядоў: яны не рызыкнулі «расчахліць» канькі.
Па аператыўных зводках арганізацыі выратавання на водах, па стане на 29 студзеня ў Беларусі з пачатку года патанула 13 чалавек, з іх 2 – непаўналетнія.
Выратавана 18 чалавек, сярод іх 1 – непаўналетні.
Папярэджана за парушэнне правілаў паводзін людзей на водах – 1 486 чалавек, з іх 197 непаўналетніх.
У Гродзенскай вобласці патануў 1 чалавек – жыхар Ашмянскага раёна, выратавана 4 чалавекі, папярэджаны – 221, з іх – 19 дзяцей.
На Астравеччыне папярэджана 55 дарослых.