Як прайшоў дзень снегу ў Альхоўскай сярэдняй школе
Калі ў вас няма ідэй, як правесці выхадны дзень, тады вам да нас – у Альхоўскую сярэднюю школу.
Лыжня працягласцю ў 3 кіламетры па маляўнічым прышкольным лесапарку, каток са зручнымі борцікамі і лаўкамі, укатаныя снежныя горкі для спуску, з якіх можна з’ехаць не толькі на санках, але і на спадручных сродках.
На чым лепш? Менавіта такі конкурс прайшоў сярод вучняў пачатковых класаў. Перамог у ім стары татаў ранец, які катаў яго з гары ў дзяцінстве.
Пасля ўдалай атакі на снежную крэпасць класа-праціўніка можна было пачаставацца смачнай гарбатай і гарачымі піражкамі, прыгатаванымі ўдзельнікамі аб’яднання па інтарэсах “Святы і традыцыі”.
Сапраўдныя шэдэўры – снежныя фігуры герояў мультыкацыйных фільмаў зляпілі дзеці і дарослыя!
Стаміўшыся ад снежных баталій і спаборніцтваў, можна было стаць на лыжню і прагуляцца па зімовым лесе, зрабіўшы фотасесію для сваёй старонкі ў сацыяльных сетках або для выпускнога альбому.
Алена КУСОЙЦЬ, намеснік дырэктара па вучэбна-выхаваўчай рабоце Альхоўскай СШ.