Палякі і літоўцы Астравеччыны ў Лідзе
11:58 / 19.12.2017
У Лідзе адбыўся абласны адборачны этап фестывалю, дзе годна прадставілі свае традыцыі, звычаі і нацыянальную кухню палякі і літоўцы Астравецкага раёна.
Здавён на Астравеччыне ў згодзе і павазе побач з беларусамі жывуць літоўцы, палякі, рускія, украінцы і прадстаўнікі іншых нацыянальнасцей. Іх аматарскія калектывы – у прыватнасці, хор «Польскае рэха Астраўца» і фальклорны ансамбль «Жыльвіціс» добра вядомыя не толькі ў раёне, але і за межамі Беларусі.
– Жаданне паўдзельнічаць у фестывалі сёлета выказалі калектывы з Навагрудскага, Лідскага, Шчучынскага і іншых раёнаў Гродзеншчыны, – расказала старшыня раённага аддзела Саюза палякаў на Беларусі Тарэса Мароз. – На суд журы трэба было прадставіць толькі адну песню. Мы выбралі «Чырвоныя ягады» – спадзяюся, не прагадалі. Хоць вынікі адборачнага этапу пакуль невядомыя.
Таксама на суд журы ўдзельнікі калектыву прывезлі нацыянальныя стравы Астравеччыны, у якіх гарманічна спалучаліся беларускія і польскія традыцыі: дранікі, бігус, паляндвіца, каўбаскі ...
Польскі падворак астраўчане аздобілі вырабамі наведвальнікаў дзённага знаходжання для маладых інвалідаў Тэрытарыяльнага цэнтра сацыяльнага абслуговаўння насельніцтва.
Гервяцкі край на абласным адборы прадстаўляў фальклорны ансамбль «Жыльвіціс», дзе з прадстаўніцамі старэйшага пакалення – захавальніцамі літоўскіх традыцый – на адной сцэне выступалі дзеці.
– На суд журы мы прадставілі танец і літоўскую народную песню, – расказала старшыня Гервяцкай абшчыны літоўцаў Святлана Лукшэне. – Таксама працавала выстава дэкаратыўнага мастацтва: тканыя ручнікі і дываны, вышыўка стужкамі, валянне з воўны.
Застаецца спадзявацца, што творчасць астравецкіх палякаў і літоўцаў прыйшлася даспадобы кампетэнтнаму журы – і наш край ізноў заззяе ў сузор’і нацыянальных культур краіны.