«Лясная казка» ў Гудагайскай сярэдняй школе
«Здаровым быць, краіну любіць, сяброў шанаваць, бацькоў паважаць» – пад такім дэвізам працавала другая змена ў прышкольным аздараўленчым лагеры з дзённым знаходжаннем «Лясная казка» ў Гудагайскай сярэдняй школе.
У першы дзень змены на лагерным стэндзе з’явілася карта Астравецкага раёна – і вандроўка пачалася. Кожны дзень вітаў нас адкрыццямі, падчас якіх мы зразумелі, што не трэба ехаць за мяжу, каб убачыць цікавыя мясціны.
Зарадка, гульні на свежым паветры, секцыі, гурткі і навуковыя аб’яднанні – без гэтага складана ўявіць аздараўленчы лагер. Гэтаксама як і без наведвання Цэнтра творчасці дзяцей і моладзі, дзе прайшлі творчыя майстэрні і гульні – дзеці былі ў захапленні.
А як не завітаць у рэдакцыю раённай газеты «Астравецкая праўда»?! Пазнаёміцца з людзьмі, якія рыхтуюць «раёнку», і пабываць у кабінеце галоўнага рэдактара… – такую магчымасць мы не маглі не скарыстаць.
Цікава і пранікнёна расказвала пра каменныя скульптуры, што ўпрыгожваюць Астравец, намеснік дырэктара раённай бібліятэкі Н.У. Ачарэтава. Колькі сэнсу і цеплыні ў гэтых на першы погляд халодных скульптурах.
Уразіла і экскурсія ў аддзел унутраных спраў. Цікава было паглядзець на работу супрацоўнікаў міліцыі, даведацца аб тым, чым міліцыя адрозніваецца ад паліцыі, як праходзіць затрыманне парушальнікаў парадку.
Нашым выхаванцам пашчасціла з надвор’ем – ім удалося некалькі разоў наведаць Янаўскае вадасховішча, пакупацца і паслухаць лекцыю выратавальнікаў на вадзе.
Прыадкрыла таямніцы малой радзімы для выхаванцаў кіраўнік школьнага музея «Знакамітыя людзі зямлі Гудагайскай» М.К. Васілёнак і настаўнікі школы І.М. Жалток і Г.М. Шлыковіч.
Яны расказалі, дзе пахаваны Іосіф Гашкевіч і чаму яго шануюць у Кітаі, пра крынічку з цудоўнай чыстай вадой у Палушах, з якой не раз піў ваду Адам Мальдзіс… А колькі гісторый і таямніц старажытнага роду Дабжынскіх захавала невялічкая вёсачка Лоша!
А колькі новага і цікавага дзеці лагера даведаліся, патрапіўшы на экалагічную сцежку «Блакітных азёр»! Змена праляцела нібы імгненне, пакінуўшы шмат незабыўных успамінаў.
Вольга БАРАНОЎСКАЯ,
дырэктар лагера «Непаседы».