Пашыраюцца сяброўскія кантакты супрацоўнікаў і наведвальнікаў аддзялення дзённага знаходжання людзей пажылога ўзросту тэрытарыяльнага цэнтра сацыяльнага абслугоўвання насельніцтва
Шчырыя, добрасуседскія стасункі завязаліся з клубам «Цёплы дом», які дзейнічае пры аналагічным аддзяленні Смаргонскага ТЦСАН. Суседзі запрасілі астраўчан у госці і паказалі свае шматлікія таленты. Астраўчанам таксама было што паказаць. Задушэўныя песні, успаміны, згадкі паядналі нашы сэрцы.
Тады ж узнікла ідэя здзейсніць сумесную паездку ў сталіцу нашай Радзімы – Мінск, пабываць у памятных і знакамітых яе мясцінах. І нядаўна задумка ажыццявілася. Астравецкі аўтапарк прадаставіў камфартабельны аўтобус, суправаджаць групу экскурсантаў быў запрошаны гід з Маладзечанскага экскурсбюро.
Найбольшыя ўражанні ў пілігрымаў засталіся ад наведвання святыняў – Свята-Духава кафедральнага сабора, храмаў святых апосталаў Пятра і Паўла, Усіх Святых і Святой Тройцы, Свята-Елісавецінскага манастыра. Незабыўныя ўражанні засталіся ад гісторыі гэтых святынь, цудоўнага насценнага роспісу – даўнейшага і сучаснага. Мы мелі магчымасць памаліцца перад святымі абразамі, падаць памінальныя запіскі. І, вядома, набыць цудоўную манастырскую выпечку, прыгатаваную з малітвай.
Дамоў вярталіся ва ўзнёслым настроі і агульнай перакананасці: такія сяброўскія кантакты павінны працягвацца і ўмацоўвацца.
Таіса СЯМЁНАВА,
фота аўтара.