Як у “Гервятах” будуюць траншэі
Зараз усе гаспадаркі раёна нарыхтоўваюць сянаж у стрэйч-плёнку, а таксама закладваюць зялёную масу ў траншэі – яны не горш за навамодную плёнку зберагуць пажыўныя рэчывы для жывёлы, безумоўна, пры захаванні тэхналогіі падчас закладкі сенажу.
Кампетэнтна
Вольга Віктараўна Умрыхіна, першы намеснік начальніка ўпраўлення сельскай гаспадаркі і харчавання:
– Асноўная прычына зніжэння якасці травяністых кармоў – парушэнне ўмоў іх захоўвання. Ніякія канцэнтраты не змогуць замяніць нізкую спажыўнасць сапсаванага сенажу. Пры закладцы траў у бурты, а не ў спецыяльныя бетонныя траншэі, страты дасягаюць 30% – кажучы простай мовай, трэць нарыхтаванага сенажу ці сіласу выкідваецца – значыць, грошы пускаюцца на вецер.
На Астравеччыне да канца 2018 года запланавана пабудаваць і рэканструяваць 17 траншэй, з якіх 11 будуць узведзены з нуля: у КСУП «Гудагай» пабудуюць 2 траншэі аб’ёмам 6 тысяч тон; у КСУП «Варняны» – спецыяльную пляцоўку для захоўвання кармоў і давядуць да толку 4 траншэі аб’ёмам 9 тысяч тон; гервятцы плануюць увесці 6 траншэй аб’ёмам 12 тысяч тон; у КСУП «Міхалішкі» з’явіцца новая траншэя ў Супранентах, яшчэ адну рэканструіруюць у Міхалішках; у РУП «Астравецкі саўгас «Падольскі» трашэя ёмістасцю 2 тысячы тон з’явіцца побач з малочна-таварным комплексам «Падольцы».
Работы па будаўніцтве ўсіх траншэй вядуцца. Праўда, ёсць праблемы з пастаўкай цэменту – а гэта падаўжае тэрміны будаўніцтва.
У тэорыі
Пра тэмпы і нюансы будаўніцтва сянажных траншэй на Астравеччыне мы вырашылі даведацца на прыкладзе КСУП «Гервяты», дзе да канца года плануецца пабудаваць іх найбольш – шэсць.
– Сянажныя траншэі будуем побач з малочна-таварнымі фермамі і комплексам. На сённяшні дзень будуюцца дзве траншэі ў Гайголях, – расказвае вытворца работ КСУП «Гервяты»Юрый Багдзевіч. – Крыху адстаём ад запланаваных тэрмінаў, але ў будаўніцтве без праблем і накладак не бывае.
● На будаўніцтве траншэй у КСУП «Гервяты» працуюць спецыялісты Лідскай ДБПМК-72, якая спецыялізуецца на выпуску жалезабетонных пліт.
● На кожную траншэю павінен быць асобны праект. Скарыстацца адзіным, тыповым, не атрымаецца: траншэі адрозніваюцца па памерах і ўмяшчальнасці. Праекты гервяцкіх траншэй распрацоўвала Воранаўскае раённае ўнітарнае праектна-вытворчае прадпрыемства.
● Аснову пад траншэю рабіла Смаргонскае ПМС, гравійна-пясчаную сумесь вазіла тэхніка Астравецкага аўтапарка №4.
● Цэмент набываюць у ААТ «Краснасельскбудматэрыялы», арматуру – у «Гроднадругчормеце».
● Збор дакументаў, узгадненне праектна-каштарыснай дакументацыі з рознымі інстанцыямі займае ад аднаго да двух месяцаў.
10 крокаў да траншэі
Здавалася б, як і ў любым будаўніцтве, галоўнае – сродкі. Калі яны ёсць – будуй сабе на здароўе, калі іх няма – думай, дзе ўзяць. Аднак нават калі на рахунку ёсць грошы, перш чым будаваць, патрэбна зрабіць дзесяць умоўных крокаў, кожны з якіх расцягваецца на дні, а то і тыдні.
1 крок
атрымаць дазвол райвыканкама на будаўніцтва;
2 крок
атрымаць заключэнне ад райЦГЭ;
3 крок
атрымаць заданне на праектаванне і ўзгадніць яго з аддзелам архітэктуры райвыканкама;
4 крок
зрабіць інжынерна-геалагічную і інжынерна-геадэзічную здымкі ўчасткаў;
5 крок
падрыхтаваць акты выбаркі кар’ераў;
6 крок
распрацаваць праектна-каштарысную дакументацыю;
7 крок
заключыць дагаворы на будаўніцтва;
8 крок
зрабіць экспертызу праекта, пры патрэбе – дапрацаваць яго;
9 крок
заключыць дагавор з прадпрыемствам, якое б ажыццяўляла тэхнічны нагляд. (У Гервятах гэтым займаецца Астравецкае ўпраўленне капітальнага будаўніцтва);
10 крок
пабудаваць траншэю.
У КСУП «Гервяты» зараз актыўна будуецца спараная сянажная траншэя ў Гайголях, у якую можна будзе закласці каля 6 тысяч тон зялёнай масы.
На аб’екце падчас прыезду працавала пяць чалавек.
– Цяпер робім мантаж сценавых блокаў, – патлумачыў электразваршчык ручной зваркі Лідскай ДБПМК-72 Аляксандр Цыбін. – Засталося да канца зманціраваць цэнтральную сцяну – і можна будзе рыхтаваць пляцоўку для бетанавання.
Акрамя работнікаў, на аб’екце ў Гайголях працавалі аўтамабіль МАЗ, «Амкадор» і так званы «каток», які трамбуе пясчаны насып.
142 сянажна-сіласныя траншэі з улікам будаўніцтва новых і рэканструкцыі старых ёмістасцю 250 тысяч тон да канца года будзе задзейнічана для захоўвання фуражу ў нашым раёне.
