Усё малако на МТФ «Ліпнішкі» здаюць вышэйшым гатункам

11:26 / 22.10.2019
На першы погляд малочна-таварная ферма «Ліпнішкі» КСУП «Гудагай» нічым не адрозні­ваецца ад сваіх малочных сясцёр: кароў тут, як і ўсюды, дояць два разы на дзень, летам рагулі пасуцца кругласутачна, працуюць людзі… Аднак далёка не кожная ферма ў раёне можа пахваліцца тым, што ўсё малако перапрацоўшчыкам там здаюць вышэйшым  гатункам. А «Ліпнішкі» могуць! Ды і не толькі гэтым. 

Летась падчас раённага свята ўшанавання працаўнікоў вёскі ажно дзве даяркі з МТФ «Ліпнішкі» падымаліся на сцэну за ўзнагародай: Ганна Сце­фановіч паказала трэці вынік у вобласці сярод апера­тараў машыннага даення, а сёлета яе партрэт занесены на раённую Дошку гонару, а Яніна Мядзейша па выніках раённага спаборніцтва стала лепшай даяркай у сваёй гас­падарцы. 

Сакрэтамі такога поспеху цікаўлюся ў загадчыцы фермы Таццяны Ступенькі.

– А сакрэту няма, – ус­мі­хаец­ца жанчына. – Дзяў­ча­ты доб­ра працуюць, стараюцца – адсюль і вынік. У змену на ферме працуюць чатыры аператары машын­нага даення: Ганна Сцефановіч, Ірына Мацкель, Яніна Мядзейша, Лілія Супрановіч, ёсць два пад­менныя: Алена Жукоўская і Юрый Мікліс, які працуе замест Алены Бейнер, пра якую пісала ваша газета, – яна ж на Дзень маці трэцюю дзяўчын­ку нарадзіла.  

На МТФ «Ліпнішкі» ўтрым­­ліваецца 175 кароў. У кожнага аператара машыннага даення свая група – а гэта каля 50 кароў. А яшчэ жанчыны даглядаюць нованароджаных цялят.

– Малыша трэба як мага хутчэй выпаіць малозівам, тады ён будзе  здаровым, лепш расці і развівацца, – расказвае аператар машыннага даення Яніна Мядзейша.

0.jpg

Даярка Яніна Мядзейша са сваімі гадаванцамі



У групе жанчыны 51 карова, але найбольш ёй падабаец­ца працаваць з цяляткамі. У пра­фі­лакторыі цяпер 22 малышы, якімі даяркі апякуюцца каля двух месяцаў, потым іх пераводзяць у групу дарошчвання. 

Працоўны дзень у даярак пачынаецца ў 5.30. Спачатку яны выпойваюць цёплым пастэрызаваным малаком цялят, перасцілаюць клеткі, а потым каля 7.00 пачынаюць даіць кароў – кожная сваю групу.

2.jpg

Памочнік загадчыка фермы Галіна Міхайлоўская працуе ў «Ліпнішках» больш за 25 гадоў


– Самае галоўнае ў нашай рабоце – добры настрой, – прызнаецца жанчына. – Пачухаеш карову за вушкам, скажаш ёй добрае слоўца – а яна табе малаком аддзячыць.

Летась на ферме памянялі абсталяванне – змены да лепшага не пры­мусілі сябе чакаць: усё малако тут мае вышэйшы гатунак. 

– У малакапровад мыючыя сродкі раней залівалі самі. Цяпер уся сістэма камп’ю­та­рызаваная: малочнае абсталяванне грунтоўна апра­цоўваец­ца пасля доек, – расказвае загадчыца фермы. 

– А яшчэ ў кароўніках зрабілі кормасталы, што значна аблегчыла работу, – да размовы далучаецца даярка Ірына Мацкель, якая працуе на ферме з 2003 года. – Раней паспрабуй ты дастаць недаедзены корм з жолаба. Цяпер – любата!

IMG_0067.jpg

У дзяцінстве даярка Ірына Мацкель марыла стаць выхавацелем і працаваць у дзіцячым садку. Але пабаялася ехаць у вялікі горад здаваць экзамен. Часткова мара жанчыны спраўдзілася: цяляткі не менш за дзяцей патрабуюць клопату і ўвагі



На МТФ «Ліпнішкі», як і на астатніх фермах, практыкуецца кругласутачны выпас кароў: летам два разы на дзень рагуль з пашы прыганялі на ферму на дойку. 

IMG_0047.jpg

Уладзімір Замара адкачвае гной на многіх гудагайскіх фермах



– З верасня перайшлі на стойлавае ўтрыманне, – расказвае загадчыца фермы Таццяна Ступенька. – Праўда, яшчэ ганяем кароў на пашу – такі праменад добра ўплывае  і на страваванне жывёліны, і на яе агульны стан. Пераход, вядома, ажыццяўлялі паступова. Каля трох дзён дадаткова выдавалі кілаграм канцэнтратаў каб не страціць малако. Надой на карову складае амаль 18 кілаграмаў малака – не рэкорд, канешне, будзем імкнуцца да большых надояў. Але радуе тое, што ўсё ліпнішскае малако мае вышэйшы гатунак.

IMG_0080.jpg

Віктар Войдак і яго памочнік конь Вася. Мужчына развозіць і раздае ўручную кармы для 300 галоў



Текст:
Фото: Алёна Ганулич