В хозяйствах Островецкого района приступили ко второму укосу
Сёлетняе лета, як капрызлівая паненка, то рэдкую сонечную ўсмешку пашле, то расплачацца праліўнымі дажджамі, то пранізлівым ветрам абдасць... Застаецца толькі спадзявацца, што нарэшце лета стане не толькі каляндарным – але і сапраўдным: з водарам зёлак і скошанай травы, буйствам красак і каласоў.
Сонца чакаюць і корманарыхтоўшчыкі. Залева напрыканцы чэрвеня перашкодзіла працаваць корманарыхтоўчай тэхніцы на ўсю магутнасць. Тым не менш, гаспадаркі раёна завяршылі першы і распачалі другі ўкос – пасля працяглых дажджоў атава не прымусіла сябе чакаць…
На мінулым тыдні на рытанскіх і кямелішкаўскіх палетках працаўнікі саўгаса «Падольскі» завяршалі першы ўкос.
Расказаць і паказаць нарыхтоўку кармоў у сваёй гаспадарцы згадзіўся дырэктар РУП «Саўгас «Падольскі» Аляксандр Віктаравіч Шчука, які, да слова, займае гэтую пасаду менш года.
– Сёлета плануем закласці больш сянажнай масы, чым летась, хоць робім гэта са спазненнем – тэхніка падводзіць: «ляцяць» рухавікі, паліўныя помпы. Запчасткі для імпартнай тэхнікі, па-першае, каштуюць дорага, па-другое, на склады гандлюючых фірм яны завозяцца толькі пасля папярэдняй аплаты. З запчасткамі для беларускай тэхнікі праблем няма – былі б грошы, – расказвае Аляксандр Віктаравіч. – Увогуле травы сёлета нядрэнныя – больш унеслі азотных угнаенняў.
Першым укосам, які ў гаспадарцы завяршыўся на мінулым тыдні, працаўнікі саўгаса «Падольскі» паклалі ў траншэі 7 648 тон сянажнай масы, што складае 41 працэнт ад запланаванага, у тым ліку 6 040 тон – з кансервантамі.
– Для нарыхтоўкі сенажу пры высокай вільготнасці закупілі спецыяльныя кансерванты, – працягвае Аляксандр Віктаравіч. – Самы лепшы і спажыўны корм, які выкарыстоўваем для кармлення цялят, атрымліваецца пры нарыхтоўцы травы ў стрэйч-плёнку. Яго назапашана каля 623 тон, другім укосам плануем нарыхтаваць яшчэ 900.
На полі непадалёк ад малочнай фермы «Дуда» два кормаўборачныя комплексы падымалі, здрабнялі і адпраўлялі ў кузавы трактароў і МАЗаў падвяленую траву, якая трапіць на кармавыя сталы рагуль у выглядзе духмянага сенажу.
Яшчэ адзін накірунак корманарыхтоўкі – сена. Напачатку лета корманарыхтоўшчыкам саўгаса «Падольскі» ўдалося «ўрваць» у непагадзі некалькі цёплых сонечных тыдняў – як вынік, яны выканалі план па нарыхтоўцы сена амаль напалову: у саўгасныя пуні трапіла 717 тон гэтага корму.
– З працаўнікоў, занятых на корманарыхтоўцы, хачу адзначыць Казіміра Садоўскага, Аляксандра Родзя, Аляксандра Раўду, Дзмітрыя Шэшу, Дзяніса Родзя, Віталя Трыбоцкага, Яўгена Крывіцкага – гэта тыя людзі, якія першымі выязджаюць у поле і апошнімі з яго вяртаюцца, – падвёў вынік гутаркі Аляксандр Віктаравіч.
Частка траў выкарыстоўваецца для кармлення грамадскага статка.
– Малочна-таварныя комплексы штодзень забяспечваюцца зялёнымі кармамі. Дойны статак у дадатак атрымлівае люцэрну. На комплексах, якія прадугледжваюць аднатыпнае ўтрыманне жывёлы, некаторыя групы выганяюцца на пашу. На невялікіх фермах жывёлу пасуць кругласутачна, – расказала аграном па кармах Алеся Іванаўна Шыманэль, – Было б надвор’е – прыступілі б да нарыхтоўкі сена… Пакуль даводзіцца чакаць.
…Верыцца, што падчас другога ўкосу корманарыхтоўшчыкам надвор’е паспрыяе – павінна ж «капрызлівая паненка» некалі змяніць гнеў на міласць.
Коратка пра галоўнае
Дырэктар саўгаса «Падольскі» Аляксандр Віктаравіч Шчука:
* Размеркаванне майго працоўнага дня залежыць ад сезону: зімой – гэта вытворчасць малака, яго якасць, таму што выручка ад рэалізацыі прадукцыі жывёлагадоўлі складае 70 працэнтаў ад агульнай. Зараз 90 працэнтаў часу прысвечана корманарыхтоўцы, а неўзабаве і жніво падаспее.
* Радуе, што пакрысе мы змаглі нарасціць аб’ёмы вытворчасці малака, а галоўнае – палепшыць яго якасць.
Алена ГАНУЛІЧ, фота аўтара.